ნინა კობახიძე - #ძლიერიქალებისქვეყანა

„ქალები მომავლისთვის“ ბიზნესასოციაციის სამეთვალყურეო საბჭოს თავმჯდომარე

რა იქცა ბიზნესის დაწყების ბიძგად?

ბიზნესი 2011 წელს დავიწყე. მაშინ, როცა საერთაშორისო კოლეგებმა საქართველოს ბაზარზე შემოსვლა გადაწყვიტეს და პარტნიორს ეძებდნენ. ისინი სადაზღვევო ბროკერის დაფუძნებას გეგმავდნენ. რეკომენდაცია კოლეგამ გამიწია და როცა გასაუბრებაზე წარმომადგენელს შევხვდი, იმ დღესვე, ერთობლივად გადავწყვიტეთ, გაგვერისკა და საქართველოში პირველი ასეთი შინაარსის კომპანია დაგვეარსებინა. ასე გაჩნდა ქვეყანაში პირველი საერთაშორისო სადაზღვევო ბროკერი, რომელიც მსოფლიოში მესამე, საფრანგეთში კი პირველ ადგილს იკავებდა. „ვილის თაუერს ვოტსონი“ ჩემი პირველი დამოუკიდებელი ბიზნესია, რომელშიც როგორც დამფუძნებელმა, შევაბიჯე. დღეს ის 10-წლიან, წარმატებულ კომპანიას წარმოადგენს, რომელიც ბაზარზე უპირობო ლიდერია და ჩემთვის ძალიან საამაყო პროექტი გახლავთ.

რა სახის სირთულეები შეგხვდათ წარმატების გზაზე?

სირთულეები ალბათ უფრო საქართველოში ბიზნესის წარმოების გზაზე შემხვედრია, თითქმის ყოველ ნაბიჯზე. თუმცა ჩემთვის თითოეული მათგანი, ახალი გამოწვევის მაგალითთან ერთად, ახალი გადაწყვეტილებების მიღების შესაძლებლობა იყო. სირთულის გადალახვის შემდეგ კი ვრწმუნდებოდი, რომ თუ მე ეს შევძელი, იგივე სხვებზეც შეიძლება გავრცელდეს და სწორედ ამიტომ, ვცდილობდი მიღებული გამოცდილება მეგობრებისთვის, განსაკუთრებით ქალებისთვის გამეზიარებინა.

რა გასწავლათ გამოცდილებამ?

გამოცდილებამ ბიზნესში მასწავლა, რომ რისკი მთავარი კომპონენტია. როცა ამას ვამბობ, რასაკვირველია არ ვგულისხმობ გაუთვითცნობიერებელ რისკს. მათი შესწავლა არის სწორედ ის საქმე, რაშიც შემიძლია ვთქვა, რომ გამოცდილებამ პროფესიონალად ჩამომაყალიბა. სადაზღვევო საქმიანობა ხომ რისკ-ფაქტორების მართვას გულისხმობს და მრავალწლიანმა მუშაობამ აღნიშნულ სფეროში, მიმიყვანა დასკვნამდე − რისკის გარეშე არაფერი გამოდის. თუმცა, სანამ გადაწყვეტ, ის გასწიო, ნებისმიერი შედეგისთვისაც წინასწარ მზად უნდა იყო.

ვინ იყვნენ ის ადამიანები, რომლებიც რთულ გზაზე მხარს გიჭერდნენ?

ერთ-ერთი რამ, რაშიც ცხოვრებაში ძალიან გამიმართლა, არიან ადამიანები, რომლებიც ცხოვრების გზაზე შემხვედრიან. მნიშვნელობა არ აქვს, იყო ის პროფესიონალი, მეგობარი, ხელმძღვანელი თუ ჩემს დაქვემდებარებაში მომუშავე − თითოეულს ჩემს განვითარებაში წვლილი შეჰქონდა. მათგანაც კი მისწავლია ბევრი, ვინც მაგალითად, დღეს ჩემს ცხოვრებაში აქტიურად აღარ არიან. ყოველთვის ვცდილობ ადამიანებისგან პოზიტივი ამოვკრიბო და ახლა, როცა უკან ვიხედები, მხოლოდ კარგი მახსოვს. ვფიქრობ, გამორჩეული კაპიტალი, რომელიც ცხოვრებაში გვაბადია, განსაკუთრებული ურთიერთობები და ადამიანებია. ჩემი გადმოსახედიდან, ასეთი დოზით ბედნიერება და მათი გვერდით დგომით წარმატება სხვას არაფერს მოაქვს.

ვინ არის თქვენი როლ-მოდელი?

ის საზოგადოებისთვის ცნობილი არ არის, ჩემი ბებიაა, ვისი სახელიც მქვია. მიმაჩნია, რომ მისგან განსაკუთრებული სიძლიერე, სითბოს, სიყვარულის გადანაწილება, წარმატების გაზიარება, ადამიანების სწორად დანახვა ვისწავლე. ეს იყო ადამიანი, რომელმაც ორი შვილი დაკარგა, მაგრამ ბოლომდე ძალიან ძლიერ ადამიანად დარჩა. როცა ძლიერ ქალებზე ვსაუბრობ, საკუთარ წარმოსახვაში ამას ყოველთვის ახლავს ჩემი ბებიის სილუეტი.

რას ნიშნავს თქვენთვის ბიზნესასოციაციის „ქალები მომავლისთვის“ წევრობა?

ასოციაციის წევრობა და მისი თავმჯდომარეობა უდიდესი სიამოვნება და გამოწვევაა ჩემთვის. აქ თავს ჭკვიანი, კვალიფიციური, წარმატებული, შემდგარი ქალები იყრიან, რომლებთან ურთიერთობამაც ასევე ბევრი მასწავლა. ჩვენ ერთად ვდგავართ, ერთმანეთს მხარს ვუჭერთ და ვაძლიერებთ. ვართ იქაც, სადაც ქალთა როლის გაძლიერებაა საჭირო.

ასოციაციამ დამანახა, რომ ქალების სოლიდარული ურთიერთთანადგომა და პატივისცემა არის ის ძლიერი ჯაჭვი, რომელიც ამდენი ხანი მართავდა ქვეყანას, მოიყვანა აქამდე და კვლავაც უამრავ წარმატებას მიაღწევინებს. ნამდვილად მიმაჩნია, რომ ეს ქვეყანა ძლიერი ქალებისაა და ქალების შრომაზე დგას.

65 ძალიან წარმატებული ადამიანი ასოციაციაში ისე ვკოოპერირებთ, რომ მხოლოდ ერთმანეთისთვის წარმატების მოტანის მიზანი გვამოძრავებს.

რას უსურვებდით/ურჩევდით ქალებს, რომელთაც ბიზნესის დაწყება სურთ?

ვურჩევდი, რომ ყველა საკონსულტაციო რესურსი გამოიყენონ. გათვალონ რისკ-ფაქტორები და შემდეგ აუცილებლად გარისკონ, უკან არ დაიხიონ. დრომ მიჩვენა და დამარწმუნა, რომ ქალები საუკეთესო მენეჯერები არიან − ეს ახსოვდეთ.

როგორ ხედავთ საკუთარ თავს სამოქალაქო საზოგადოების ფორმირებაში?

საკუთარ თავს ვხედავ ყოველთვის იქ, სადაც სიმართლე უნდა ითქვას. არასდროს, არავის არცერთ გადაცდომაზე, კანონდარღვევაზე თვალი არ დამიხუჭავს, არ გავჩუმებულვარ. ნებისმიერი ხელისუფლების მხრიდან, თუ რომელიღაც გადაწყვეტილება არ იქნება სწორი, ცუდ გავლენას იქონიებს ბიზნესზე, ამა თუ იმ სექტორზე, რომელშიც ვმუშაობთ. არც ამას შევეგუები. ამ დროს ერთადერთი იდეაფიქსი მამოძრავებს, რომ ჩემი და ჩვენი შვილებისთვის წელში გამართული, ძლიერი ქვეყანა ჩამოყალიბდეს. თითოეული არასწორი ნაბიჯის კორექცია, ვფიქრობ ისაა, რაც ყველამ საკუთარ თავზე უნდა ავიღოთ. ეს მიმაჩნია ძლიერი საზოგადოების მაფორმირებელ უმთავრეს დეტალად.

როგორია თქვენი დღის განრიგი? როგორ გეგმავთ კვირას, თვეს? როგორ ანაწილებთ დროს საქმიანობასა და ოჯახზე?

რთულია დროის გადანაწილება, თუმცა გამოცდილებამ მასწავლა, რომ შევძლო, ეფექტურად ვმართო დრო, არასდროს დავაკლო ის ოჯახსა და მეგობრებს.


ფოტო: ლელი ბლაგონრავოვა

34/36 Abashidze, 0179, Tbilisi, Georgia               +995 595 803 333

www.w4t.online          info@w4t.online

Get In Touch

Copyright © 2020 "Women for Tomorrow" Business Leaders' Federation - All Rights Reserved.

  • Facebook
  • Twitter
  • YouTube
  • Instagram
  • LinkedIn