ადა ნანიკაშვილი - #ძლიერიქალებისქვეყანა

წარმატება არის შედეგი, რომლისკენ მიმავალ გზასაც თავდაუზოგავი შრომა და მონდომება წარმოადგენს. იყო ქალი ლიდერი, უზომოდ დიდი პასუხისმგებლობაა, რადგან ბევრი ადამიანისთვის სამაგალითო ხდები. იაზრებ, თუ რამდენად მნიშვნელოვანია ის ნაბიჯები, რომლითაც წარმატებას უახლოვდები და არაერთ ქალბატონს აძლევ მოტივაციას, უბიძგებ მოქმედებისკენ ყოველივე ამით. OK! გაესაუბრა ქართველ ქალ ბიზნესლიდერსა და სამთო-მოპოვებით დარგში მომუშავე კომპანია „აიემსის“ IMC მფლობელს, ადა ნანიკაშვილს აღნიშნულ საკითხთან დაკავშირებით.

რას ნიშნავს თანამედროვე მსოფლიოში იყო ქალი ლიდერი, ქალი ბიზნესლიდერი?

თანამედროვე მსოფლიოს განვითარების ბოლო ათწლეულის განმავლობაში, ქალი ლიდერის როლი ყველა სფეროსა და ინდუსტრიაში გაიზარდა. ძალიან სასიამოვნოა, რომ დღესდღეობით ქალი ლიდერები, განსაკუთრებით ბიზნესსფეროში, უდიდეს წარმატებებს აღწევენ და საამაყოა, რომ ისინი გამორჩეულად ინოვაციური იდეების გამტარებლები არიან.

როგორ გაჩნდა ბიზნესის წამოწყების იდეა? საიდან იღებს სათავეს ბიზნესი, რომელიც დღეს ასე წარმატებულია?

კომპანია „აიემსი“ 2006 წლიდან არის ბაზარზე. მართალია, მის მართვაში არ ვერეოდი სხვადასხვა მიზეზის გამო, მაგრამ მისი ფაქტობრივი მფლობელი ვიყავი. 2014 წელს კომპანიის მმართველობა სრულად გადმოვიბარე და მინდა აღვნიშნო, რომ იგი სრულიად არასახარბიელო მდგომარეობაში დამხვდა. მივხვდი, რომ საქმე, რომელშიც თავად არ ხარ ჩართული, შენთვის მომგებიანი და მით უმეტეს, წარმატებული ვერ იქნება. ძალიან ბევრი წვალებისა და შრომის შედეგად, კომპანია საბოლოოდ ფეხზე დავაყენე. სფერო ჩემთვის თავიდანვე საინტერესო აღმოჩნდა. როგორც ჩანს, ჩემმა გენეტიკამ თავი იჩინა. ბაბუაჩემი − ცნობილი სამთოელი, თავისი საქმის უბადლო სპეციალისტი და მოყვარული იყო. საბჭოთა კავშირის პერიოდში, წლების განმავლობაში ტყიბულის მაღაროს ხელმძღვანელობდა. ჩვენი სფეროც სამთო-მოპოვებითია, ქვანახშირს არა, მაგრამ ინერტულ მასალებს ვამუშავებთ. იმის მიუხედავად, რომ საქმე საკმაოდ რთული და შრომატევადია, ის მე ძალიან მიყვარს. თუმცა, ვფიქრობ, მხოლოდ საქმის სიყვარული არაა საკმარისი. შრომისმოყვარეობამ და ძლიერმა გუნდმა განაპირობა ის, რომ ჩვენ დღეს ბაზარზე ერთ-ერთ წარმატებულ კომპანიას წარმოვადგენთ და ბედნიერი ვარ, რომ შევძელი ამ გუნდის ჩამოყალიბება. აქვე, დანანებით მინდა აღვნიშნო, რომ ამ სფეროში, ისევე, როგორც ბევრ სხვა სფეროში, კადრების დეფიციტი ერთ-ერთ მთავარ პრობლემას წარმოადგენს.

ყველაზე დიდი სირთულე, რომელიც თქვენს პროფესიას ახლავს…

როგორც აღვნიშნე, საკმაოდ რთული სფეროა. სწორედ ამიტომ, სულ ცოტა ხნის წინ დავაფუძნეთ „სამთო-მოპოვებითი მრეწველობის ასოციაცია“ AGMI, რომელსაც დარგის განვითარებისთვის ძალიან ბევრი მნიშვნელოვანი მიზანი აქვს დასახული. უპირველეს ყოვლისა, გვინდა კოორდინირებულად ვიმუშაოთ გარემოს დაცვით ორგანიზაციებთან და სოფლის მეურნეობისა და გარემოს დაცვის სამინისტროსთან, რათა შევძლოთ ოქროს შუალედის დაჭერა გარემოზე ნეგატიური ზემოქმედების კუთხით იმისთვის, რომ მრეწველობის ამ დარგმა შეძლოს უფრო მდგრადი განვითარება, რაც ადეკვატურად აისახება ჩვენი ქვეყნის ეკონომიკაზე. მინდა აღვნიშნო, რომ „კოვიდ“-პანდემიის პერიოდში ჩემ მიერ ნახსენები დარგი ერთადერთია, რომელმაც ეკონომიკური ზრდა განიცადა. ასევე, როგორც ზემოთ აღვნიშნე, საკმაოდ დიდი პრობლემებია კვალიფიციური კადრების თვალსაზრისით. სწორედ ამიტომ, ჩვენს ერთ-ერთ მთავარ მიზნად სამთო-მოპოვებითი მრეწველობის მიმართულებით საგანმანათლებლო პროგრამების განხორციელება დავისახეთ. ვფიქრობთ, რომ სპეციალისტების ნაკლებობა აღნიშნული დარგის განვითარებას ხელს შეუწყობს. ასოციაციის წევრები კიდევ მრავალი მიზნის ირგვლივ გავერთიანდით და მომავალში ბევრ სიახლეს შევთავაზებთ სამთო-მოპოვებითი მრეწველობის სფეროს.

რას ნიშნავს თქვენთვის, საკუთარი საქმიანობით წვლილი შეგქონდეთ ქვეყნის ეკონომიკური დოვლათის შექმნაში?

ეს პირადად ჩემთვის საკმაოდ სასიამოვნო მომენტია. ყველა ამ ქვეყნის შვილები ვართ და გვინდა საკუთარი წვლილი შევიტანოთ მის განვითარებაში. გამოგვდის ეს თუ არა, მხოლოდ ჩვენზე არაა დამოკიდებული. აქ ბევრი ნიუანსია, რომელზეც დამოკიდებული ხარ…

მოგვიყევით კომპანიის მიმდინარე სიახლეებზე. როგორ შეაჯამებთ 2020 წელს? რა შეაფერხა და რა გამოავლინა არსებულმა ვითარებამ?

როგორც ზევით აღვნიშნე, ამ წელს ბევრი რამ გვაქვს გეგმაში. დეტალები, ალბათ, საინტერესო არ იქნება. მიუხედავად იმისა, რომ ქვეყანაში პანდემია იყო, ჩვენი კომპანია და სფერო ჯერჯერობით არ შეფერხებულა.

როგორია ქალი მნიშვნელოვან თანამდებობაზე დომინანტი მამაკაცების გარემოში?

ძალიან ჩვეულებრივი. არანაირად არ უნდა იფიქრო, რომ მამაკაცები დომინანტები არიან.

3 რამ, რაც ქალს პროფესიული მიზნების მისაღწევად სჭირდება…

მიზანდასახულობა, გამბედაობა და შრომისმოყვარეობა.

შეგიძლიათ თქვათ ფრაზა: „მივაღწიე იმას, რაც მსურდა“?

ჯერ არა, და ალბათ არც არასდროს ვიტყვი, რომ ყველაფერს მივაღწიე.

ყველაზე დიდი წვლილი თქვენს წარმატებაში ვის ან რას მიუძღვის?

ჩემთვის ყველაზე დიდი მოტივაცია ჩემი შვილები არიან. შესაბამისად, საკუთარ წარმატებას მათ მივაწერ.

შეთავსებადია თუ არა წარმატებული ქალი და ოჯახი?

სრულიად შეთავსებადია. მთავარია, დრო სწორად გაანაწილო.

გრჩებათ თავისუფალი დრო? როგორ ატარებთ?

ძალზე დატვირთული განრიგის მიუხედავად, ყოველთვის ვიტოვებ თავისუფალ დროს, რომელსაც ოჯახთან ერთად ვატარებ და საკმაოდ აქტიურ სპორტულ ცხოვრებას ვეწევი.

რა არის თქვენი ცხოვრების მთავარი დევიზი?

„აკეთე მუდამ სიკეთე და იგი ბუმერანგივით დაგიბრუნდება…“


ფოტო: ლელი ბლაგონრავოვა